ថ្នាំរឹត Kinal Baume និងថ្នាំប៉ូវ Protenciator មានវត្តមានក្នុងព្រឹត្តិការណ៍រត់ប្រណាំងអន្តរជាតិពាក់កណ្តាលម៉ារ៉ាតុងនៅអង្គរវត្តឆ្នាំ២០២៤

អ្នករត់ប្រមាណជិត១៥.០០០នាក់មកពី៨៧ប្រទេសបានចូលរួមក្នុងព្រឹត្តិការណ៍រត់ប្រណាំងអន្តរជាតិពាក់កណ្តាលម៉ារ៉ាតុងលើកទី២៩ ដែលប្រព្រឹត្តទៅនៅអង្គរវត្តកាលពីថ្ងៃទី១ ធ្នូ ក្រោមអធិបតីភាពសម្តេចមហាបវរធិបតីហ៊ុន ម៉ាណែត​ នាយករដ្ឋមន្រ្តីនៃព្រះរាជាណាចក្រកម្ពុជា និងសមាជិករាជរដ្ឋាភិបាលជាច្រើនរូបទៀតដែលបានចូលរួមរត់ប្រណាំងផងដែរ។

មន្ទីរពិសោធន៍ប៉េប៉េអឹម និងដៃគូរសហការរបស់ខ្លួនគឺមន្ទីរពិសោធន៍ FSAE បានចូលរួមគាំទ្រព្រឹត្តិការណ៍កីឡាដ៏ធំមួយនេះដែលរៀបចំឡើងនៅលើទឹកដីប្រវត្តិសាស្រ្ត និងទេសចរណ៍អង្គរ តាមរយៈការចែកអំណោយថ្នាំរឹត Kinal Baume ដែលជាផលិតផលរបស់សហគ្រាសផលិតឱសថប៉េប៉េអឹមទៅដល់កីឡាករដើម្បីម៉ាស្សាសាច់ដុំមុននឹងរត់ និងថ្នាំប៉ូវ Potanciator ដែលជាផលិតផលរបស់មន្ទីរពិសោធន៍ FSAE។

បើតាមប្រសាសន៍របស់អ្នកស្រីវេជ្ជបណ្ឌិត សៃ ស្រីមុំ ប្រធានផ្នែកទីផ្សាររបស់មន្ទីរពិសោធន៍ PPM-FAES សហគ្រាសផលិតឱសថប៉េប៉េអឹមបានផ្តល់អំណោយជា Kinal strips ចំនួន១៥ ០០០ សន្លឹក និងថ្នាំរឹត Kinal Baume ចំនួន១៥០០​ ទីប ចំណែកឯមន្ទីរពិសោធន៍ FSAE បានចែកថ្នាំប៉ូវ Potanciator ចំនួន១៥០០ អំពូលទៅដល់គណៈកម្មាធិការរៀបចំការរត់ប្រណាំងម៉ារ៉ាតុងនៅកម្ពុជាដើម្បីយកទៅចែកបន្តដល់កីឡាករ និងសេវាកម្មសុខភាពដែលត្រូវបានដាក់ពង្រាយសម្រាប់ព្រឹត្តិការណ៍នេះ។

អ្នកស្រីវេជ្ជបណ្ឌិតបានគូសបញ្ជាក់យ៉ាងដូច្នេះ៖ «គឺជាកិត្តិយសដ៏ធំណាស់សម្រាប់យើងដែលបាន​ចូលរួមចំណែកក្នុងព្រឹត្តិការណ៍ថ្នាក់អន្តរជាតិដ៏សំខាន់មួយនេះអមដោយទេសភាពដ៏ស្រស់ត្រកាលនៃតំបន់អង្គរ តាមរយៈអំណោយទាំងអស់នេះ ព្រោះថាការរត់ប្រណាំងពាក់កណ្តាលម៉ារ៉ាតុងដែលអ្នកណាៗក៏អាចចូលរួមបានដែរនោះ គឺជាឱកាសដ៏ល្អសម្រាប់សហគ្រាសយើងដើម្បីស្វែងយល់កាន់តែច្បាស់ពីបេសកកម្មរបស់យើងក្នុងការលើកកម្ពស់សុខភាព និងសុខុមាលភាពរបស់ប្រជាពលរដ្ឋទូទៅ។ ម្យ៉ាងវិញទៀត​ ព្រឹត្តិការណ៍រត់ប្រណាំងនេះមានលក្ខណៈមនុស្សធម៌ មិនខុសអ្វីពីសហគ្រាសរបស់យើងក្នុងក្រ័បខណ្ឌគោល​នយោបាយទំនួលខុសត្រូវសង្គម និងបរិស្ថាននោះឡើយ»។

ក្រៅពីអំណោយសម្រាប់គណៈកម្មាធិការរៀបចំការរត់ប្រណាំងម៉ារ៉ាតុង មន្ទីរពិសោធន៍ PPM-FAES ក៏បានចែកចាយផ្ទាល់ទៅដល់កីឡាករនៅនឹងស្តង់របស់ខ្លួននូវថ្នាំរឹត Kinal Baume និងថ្នាំប៉ូវ Potanciator កាលពីថ្ងៃទី២៩ និង៣០ វិច្ឆិកា ខណៈពេលដែលកីឡាករទាំងនោះមកយកអាវយឺត និងកញ្ចប់សម្ភារៈសំខាន់ៗផ្លូវការសម្រាប់អ្នករត់។ លើសពីនេះទៅទៀត នៅស្តង់ PPM-FAES កីឡាករខ្មែរ និងបរទេសក៏អាចចាប់ឆ្នោតផ្សងសំណាងដើម្បីទទួលបានអំណោយជាច្រើនមុខផងដែរ៕